සියලු මව්වරුන්ට උපහාරයක්ම වේවා

 

අම්මේ ඔබෙ ආදරෙ මට මහ මෙරක්           තරම්

වින්දේ ඔබ මහ දුක්ගිනි හිමාලය                 තරම්

දුකක් දැනුනු විට හඩනවා මන් ඔබේ අත     බදන්

මට මතකයි ඔබත් ඇඩුවා දොර මුල්ල         බදන්

දස මසකුයි මවක් දරුවා දරා                සිටින්නේ

නැත අම්මේ එය නම් මම එකග    නොවෙන්නේ

ආත්මයෙන් ආත්මයට ඔබ පතනවා       වැන්නේ

සංසාරෙන් සංසාරෙට වරම්                 ලබන්නේ

මල්වර වූ දිනයේ මෙමා දුටුවා                 අම්මේ

නෙත් දෙක ඔබෙ දිලිසුනෙ පලිගු කදුලු        සේ

නෙතින් වැටෙන හැම කදුලක් පාසා        ඔබගේ

සතුටු කදුලු වේවා මන් පතනවා               අම්මේ

එකම පෙමයි අදටත් ලොව තුළ       බබළන්නේ

එකම නමයි අදටත් ලොව වැජඹී      තිබෙන්නේ

එකම කෙනයි දරුදුකකින් හද දෙකඩ කරන්නේ

මේ තරමට ආදරයක් කොහෙන්ද            අම්මේ

මඩෙහි උපන් නෙලුම

 

මඩ ගොහොරුවක උපන්නද 

වරම් ලද්දේ බුදු පුදට

මඩ බිමෙක කිලිටු දුගද බව 

කිසිදා ගෑවුනද නෙලුම් මල් පෙත්තක 

බුදු උපතට පවා පිපුනේ 

නොදන්නෙහිද නෙලුම් මල් සතක් බව

සුමුදු මල් පෙත්තක තිබෙන සුවය මිස 

කීවාද නෙලුමක උපත් කතාව

කෙසේ දුක්බර වුවත් ඇරඹුම

පිපියන් නෙලුමක් විලස

2013 - කතා කරන සිතුවම්

 

සමාජ මාධ්‍යජාල භාවිතය ලාංකික තරුණ සමාජයට කරන බලපෑම

රටක ජීවනාලිය වන්නේ තරුණ පරපුරයි.එකී තරුණ පරපුර ඔදවත් විය යුතුය . තෙදවත් විය යුතුය .එසේම හෙට රටේ සුක්කානම භාර දිය යුත්තේ ද එවන් තරුණ පරපුරකටය.නමුත් වර්තමාන ශ්‍රී ලංකාවේ සමාජ ජාල භාවිතය ලාංකීය තරුණ සමාජය ගිලගෙන ඇත.එකී සමාජ ජාලා තුලින් ලාංකික තරුණ පරපුරට වන හානිය මෙන්ම යහපතද අද දක්නට ඇත.

තාරුණ්‍ය යන්නෙහි එක් අර්තයක් නම් බැබලීම යන්නයි.බැබලෙන තරුණ පරපුර රටටම සම්පතකි.ශ්‍රී ලංකාවේ 30 අවුරුදු යුද්ධයේදී වීර සොල්දාදුවන් ලෙස ක්‍රියා කරන ලද්දේ අපගේ තෙදවත් තරුණ කැලමය.නමුත් වර්තමානය වන විට එකී තරුණ පරපුර සමාජ ජාලා තුළම අතරමන් වී ඇත.ඉමෝ,වට්සැප්,මුහුනු පොත වැනි බොහො සමාජ ජාල මාධ්‍ය වර්තමානයේ බහුලය.එක් අතකින් මෙම මාධ්‍ය යහපත් ආකාරයට විපාක දෙන අතර ඇතැම් විට අයහපත් වේ.

සාමාජ ජාලා වෙබ් අඩවි නිසා ශ්‍රී ලංකාවේ බොහෝ තරුණ තරුනියන් අද දුරකථනයටම්ස් සීමා වී ඇත.අවුරුදු සමයේදී අවුරුදු උත්සව සංවිධානය කල,ක්‍රීඩා උත්සව සංවිධානය කල පිරිස් අද යොමුව ඇත්තේ මුහුනු පොත හරහා බීච් පාටී දැමීමටය.එසේම අවුරුදු 16,17 වැනි වයස් සීමාව වන විට බොහෝ තරුණ තරුණියෝ යොමුව සිටින්නේ අධ්‍යාපනය අත හැර විවිධ රැකියා වලට යාමය.එසේ වීමට හේතු වී ඇත්තේ සමාජ ජාලා හරහා තරුණ තරුණියන්ට වයසට නොගැළපෙන රැකියා අවස්තා හිමි කර දීමය.නමුත් ඒවා තාවකාලික ය.

නමුත් යහපත් බලපෑම් ද නැතුවාම නොවේ.වර්තමාන සමාජය තොරතුරු මූලික සමාජයකි.එසේ නම් තරුණ පරපුර රටේ සංවර්ධනයට අතහිත දීමට නම් සමාජ ජාල හරහා දැනුමෙන් සන්නද්ධ තාරුණ්‍යයක් අපට තිබිය යුතුය . එසේම වර්තමානයේ රට රටවල් අතර අන්තර් පුද්ගල සබදතා වර්ධනය වීමද බොහෝ සෙයින් බලපානු ලබන්නේ මෙම සමාජ ජාල මාධ්‍ය වේ.

දුවගේ චිත්‍රය - ඉලක්ෂ ජයවර්ධන

 

ඉලක්ෂ ජයවර්ධනයන්ගේ දුවගේ චිත්‍රය පද්‍ය පන්තිය තුළ බැලූ බැල්මට ඇත්තේ පියෙකු විසින් සිය දියණිය ඇදි සිතුවමේ අඩුපාඩු සකසමින් එකී සිතුවම තවත් අලංකාර කිරීමට උපදෙස් සැපයීමයි.නමුත් ඒ තුළ සැගවුණු විශාල අර්ථයක් ඇති බව මට හැගේ.දියණියගේ සිතුවම සම්පූර්ණ කිරීමට පියා උපදෙස් දෙනු ලබන්නේ ඉතා සංවේදී අයුරිනි.මෙකී පද්‍ය පන්තිය රස විදීමේදී මට හැගෙන්නේ දියණියගේ මව වියෝවි ඇති හෝ ඇය සිය පවුල අතහැර ගොස් ඇති බවය.එම නිසා එයින් සංවේගයට පත් පියා සිය දියණියගේ සිතුවමේ සංකේත තුලින් එකී සංවේගය ,හැගීම විදහා දක්වන අයුරු පෙන්වයි.පියාගේ තනිකම ,පාලුව කියවෙන්නේ පහත අයුරිනි.

අහසට ලස්සනම ගෑවමයි දම්  පාට

හදත් අයිනෙන් අදිමු එය නැතුවම බෑ රෑට 

රාත්‍රි අහස පිලිබද කතා කිරීමේදී අපට පළමුව සිහියට නැගෙන්නේ සදයි.පවුලක් තුළ ද එසේමය.රාත්‍රි අහස පියා වැනිය.සද මව වැනිය .ඒ වටා එතුනු තරු දරුවන් වැනිය.රාත්‍රි අහස අලංකාර වන්නේ සද නිසා ය.නමුත් මෙහි එන පියාට ඔහුගේ සද නැමැති භාර්යාව අහිමි වී ඇත.එය ඉතා සංවේදී ආකාරයට කියවෙන්නේ හදත් අයිනෙන් අදිමු එය නැතුවම බෑ රෑට යන පද පේලියෙනි.මෙය දියණියට පියාගෙන් ලැබුනු එක් අදහසකි.නමුත් එය පියාගේ හද පතුලෙහු කීරී ගැහෙන තනිකමයි.

එසේම තවත් විටෙක හදෙහි ආවාට නොඇද සිටින ලෙස පියා දියණියට පවසයි.එසේම සද සාවාට දුර බව පවසයි.සදෙහි සාවෙක් සිටින බවට අප පුංචි අවධියේ සිට අසා පුරුදු දෙයකි.නමුත් වැඩිවියට පත් වන විට අප කොයි කවුරුත් දන්නේ සදෙහි ඇති ආවාට එකතුව සාවෙකුගේ රූපයක් මවන බවයි.එබැවින් සදෙහි සාවෙක් සිටීම උපකල්පනයක් බව පවසයි.සිය බිරිද නොමැතිව සතුට ලගා කර ගැනීම පියාට දැනෙන්නේ සාවාට සද මෙනි.

දුවගේ චිත්‍රය පද්‍ය පන්තිය තුළ මා මා සංවේගයට පත් කල තවත් එක් පද පෙලකි.

ගනනතේ මායිමේ නුඹ ඇදපු වවුලාට 

ලගින් තවකෙක් අදිමු තනිය හොද නෑ ඌට 

මෙහි එන පියා තම දියණිය සමග තනි වූවාට සිතුවමක් තුළ වුවද තමාට දැනෙන්නා වූ තනිකම තවකෙක්ට දැනෙන්නට දීමට අකමැතිය.සිතුවමක් යනු ජීවමාන වස්තුවක් නොවුනත් ඒ තුලින් පුද්ගලයෙකුගේ හැගීම කෙසේ තීව්‍ර කර හැකිද යන්න මෙම පද්‍ය පන්තියෙන් මනාව ඔප්පු වේ.

මෙකී පද්‍ය පන්තිය අවසන් වන්නේ දියණියගේ සිතුවමේ අවසානයෙනි.

චිත්‍රෙ අපි නොඇද ඉමු දුවේ අපි දෙන්නාව

එහෙම උනොතින් ළමයි සොයයි නුඹෙ අම්මාව

මෙය මා සංවේගයට පත් කල පද පෙළකි.පියාට දියණිය සේම දියණියට සිටින්නේ පියා පමණි.පියාගේ සිතේ කෙතරම් දුකක් තිබුනද එය තම දියණියට ලබා දීමට පියා අකමැතිය.

ඒ අනුව මා හට සිතෙන්නේ දුවගේ චිත්‍රය ලෙස මෙකී පද්‍ය පන්තිය මාතෘකාගත කළද උඩු අර්තයට වඩා හැංගුනු හැගීම් සම්බන්ධ ගනුදෙනුවක් ඒ තුළ අන්තර්ගත වන බවයි.

 

තවමත් ඔබ මගේය - එච්.එම්.කුඩලිගම

 

කොළඹ යුගයේ බොහෝ තරුණ කවියන් සිය කවීත්වය බොහෝ සෙයින් ප්‍රකට කරන ලද්දේ ළමා  හා තරුණ කවි ආශ්‍රිතව ය.එසේම කොළඹ යුගයේ පළමු කවි තරංගයේ  කවීන් සේම දෙවන කවි තරංගයේ ද කවියෝ සිය පෑන මෙහෙයවූයේ ළමා හා තරුණ හදවත් ආකර්ෂණය වන ලෙසටය.එකී ආරයේ කතුවරයෙකු වන්නේ එච්.එම් කුඩලිගමයන් ය.ඒ අනුව එතුමාගේ තවමත් ඔබ මගේය පද්‍ය පන්තිය තරුණ පිරිස් ආකර්ෂණය කරගත් තවත් එක් පබැදුමකි.

               මෙකී නිර්මාණය ලියා ඇත්තේ උත්ත්ම පුරුෂ දෘෂ්ටි කෝණයෙනි.එසේම එළිසමය රැක ඇති සරල සිව්පද ආකෘතියක් ප්‍රයෝජනයට ගෙන ඇත.කොළඹ යුගයේ දෙවන කවි පරපුර නියෝජනය කරන , රොමෑන්ටික් කවියේ ආභාෂය කැටි කරගත් සිංහල ශෛලී අන්වර්ත නාමයෙන් හදුන්වන මොහු ඈ,කුණාටුව,සිරිමලී යන නිර්මාණ තුලින් සිය කවි හැකියාව පෙන්නුම් කලේය.ඒ අනුව පෞද්ගලික අත්දැකීමක් පාදක කරගනිමින් රචිත තවත් පබැදුමකි ,තවමත් ඔබ මගේය .

කවියා මෙම යතාර්තය ඉදිරිපත් කිරීමේදී යොදා ගත් බස සරලය.කාව්‍ය අත්දැකීම් පාඨකයන්ට භාවාත්මකව සමීප කරවීම සදහා යොදා ගත් කාව්‍යමය බස් වහර විචිත්‍රවත්‍ ය.පැදිපෙළ පුරා ගීතවත් විරිතක් පැතිර ඇත්තේ කවියා යොදා ගෙන ඇති මටසිලිටි බස් වහර නිසා ය.සහෘදයා තුළ කාව්‍ය අත්දැකීම් තීව්‍ර කිරීම සදහා කවියා යොදා ගත් භාවාත්මක බස් වහර සමත් ය.හිරිමල් හලන්නට,සිහිලැල් සිනා රැලි , උණු කදුලැලි,අදුරු සෙවනැලි , වැනි යෙදුම් ඒ සදහා උදාහරණ වේ.මේ යෙදුම් නිසා කාව්‍ය අත්දැකීම් පිලිබද  භාවික හැගුම් සහෘදයාට උපදවා ගත හැකිය.

තවමත් ඔබ මගේය පැදි පෙල පරිසර හා සබැදි ස්වභාව සෞන්දර්ය ද තීරණාත්මක ලෙස බද්ධ කරමින් රසික හදවතට ස්පර්ශ කර ඇත්තේ අපූර්ව ලෙසය.කවියා හාත්පස නෙත ගැටුනු කදු හෙල් තැනිතලා ඇළ දොළ වැනි ස්වභාව වස්තූන් රජදහන කර ගනිමින් ඒ හා බැදුනු තමාගෙන් වෙන්වූ සෙනෙහෙවන්තිය සිහි කර පෙම්වතාගේ සිත් සතන් තුළ නිදන් ගත වූ අතීත මතක සටහන් ආවර්ජනා කරමින් නිර්මිත වූවකි.

පිරිමි හදවත්

 

ලියන කියවෙන සෑම කවියම

ගෙතෙන්නේ මෘදු ගැහැණුකමටයි

පිරිමි හිත් ගැන ලියන කවියෝ

කාන්තාරයේ මල් පිපෙන ගානයි

නිතර වෙහෙසෙන පිරිමි හදවත්

ගැහෙන්නේ මල් බදු ගැහැණු නමටයි

කවියෝ කවි වැල් නොලුව්වේ ඇයි

පිරිමි ඇතුළතින් වෙඩරු ගානයි

තුරුණු විය නම් හරි සැකයි

 

සිතේ රැදුනත් බොහෝ සිතුවිලි 

කියා  ගන්නට නෑ පෙමක්

විටෙන් විට එන සිතැගි සිතුවිලි 

පුබුදුවයි සිත මහමෙරක්

බොහෝ පෙම්බර පෙම් හසුන් මගෙ

සිතට මුවගට හසු උවත්

දඩබ්බර හද කවුරු  වෙනුවෙන් 

ගැහෙනවද නෑ අදහසක්

ගෙවී යන මේ තුරුනු අවධිය 

නොයෙක් සිතුවිලි උපදවයි

බොහෝ දේ අතරින් මගේ සිත 

දුවන්නේ පෙම් කවි වෙතයි

පෙම් හසුන් මට හමුවුනත් දැන්

සිතට ඒවා හරි බරයි

කාලයට ඉඩදී බලා හිදිමි මම

තුරුණු විය නම් හරි සැකයි

තනි තරුව ඔබ කවුද

 

බලන විට අහසේ තනි වුණු පුංචි         තරුවක් 

හිනා වුනා හොරෙන් පෙනෙන්න මට පමණක් 

තනිව ඔබ ඇයිද විමසුවා මම             පැනයක්

තනිය හුරුයි මට තරුව හෙලුවා          සුසුමක්

බොහො අය කතා කළද රෑ අහස         මනරම් 

තනි වුණු තරුව නෑ මෙමට                සතුටක්

හද එළිය වැටුණු විට රෑ අහස              බලවත්

කවුරුද සෙවුවේ තරුව නෑ එවිට එහි  එළියක්

බොහෝ දේ ඇති මුත් කියන්නට මෙමට දැන්

තනි තරුවේ දුප්පත් මෙමට රෑ නින්ද   සතුටක් 

සමාවෙයන් මට මාත් තනි                 තරුවක්

අමතක නොකර හෙට එනවාද තනි වෙමු අපි දෙන්නා පමණක් 

කැඩපත නුඹ හරි වංචාකාරයි

 

කැඩපත නුඹ කලා මට වංචාවක්

විස්වාස කළා නුඹව මහමෙරක් තරම් මං

තිබුණත් බොහෝ දේ යටි සිතේ ඇතුළත් 

පෙන්නුවේ නුඹ මෙමට උඩු අරුත පමණක් 

වගකීම පමණක් දුටුවේ මං ඔබෙන්

නොපෙන්නුවේ මන්ද හිත ඇතුලෙ සතුටක්

බොහෝ ලස්සන දේ මා තුළට ආවත්

කැඩපත නුඹ පෙන්නුවේ මට මාව පමණක්

පුතේ අජාසත් නැවත වෙයන් මට පුතෙක්

 

පාප මිත්‍ර ඇසුරෙ 

ගෙවුනත් ඔබෙ තරුණ දිවිය 

මොහොතකට සිතුවාද

ඔබේ පියා මා බිම්බිසාර ගැන

දුන් දරු සෙනෙහස 

කීතු කර ඉරද්දී

දුන් ඒ ආදරය...

දන්නවාද පුත

දෙපතුල් පලා ලුණු ඉස වේදනා දෙද්දී

වේදනා දුන්නේ දෙපතුල්ම නොව

දෙකඩ වූ හදවත බව

කෙතරම් ඉසිලුවත් ගතෙහි වේදනාව

ඉවසනු නොහැකි වූයේම මට 

වේදනා දුන්නේ මගේම ලේ 

ජාතක කළ

පුත අජාසත් නැවත වෙයන් මට පුතෙක් 

පිය සෙනෙහස උතුරන

ඔබ කරගත් පාපී කදට එරෙහිව ...

 

මවකි මමත්

 

දින ගනන් ගත වේවී යනකොට

පුංචි බයකුත් දැනුන මුත්

කිරි කැටි සිනා නුඹෙ දකින තුරු මට

නෑ තිබුනෙ ඉස්පාසුවක් 

නුඹ කෙසේ දැයි සිතන විට මට 

නර්ස් නෝනගේ පිළිතුරක් 

පුතු පැටියෙක් කුසේ අම්මේ

ඇය කිව්වා මගෙ අත බදන්

දස මසක් කුස හෝවා ගත් නුඹ 

පුංචි මැනිකක් මට වුනේ

දිනෙන් දින මම දවස් ගැන්නේ

හොවා ගන්නයි මගෙ ගතේ

කිරි සුවද ගත හිතට දැනෙන විට

කියා ගන්නට බෑ මෙසේ

උතුම් පදවිය මවක් ලෙස මට

දුන්නු නුඹ මට රජෙක් පුතේ

සිතේ ඇදුනා වූ එකී රූපය

ජීවමානයි මට පෙනේ

සතුටෙ කෙලවරක් නෑ මෙමට දැන්

වේදනාවක් නොම දැනේ

දුටුව විට ඒ පුංචි රූපය 

නෙතෙන් කදුලක් මගෙ සැලේ

පුංචි පුතේ මගෙ හයිය වෙයන් නුඹ

රකිනවා මං මගෙ පන වගේ

ස්තූතියි කොරෝනා නුඹට

 

කියා දුනි නුඹ අපට 

අමතක නොවන පාඩමක්

වැටහුනි අපට 

බුදුන් දෙසූ ලෙසට

ජීවීතයක ඇති 

අනියත බව

කොරෝනා නුඹ 

අපට කියා දුන්නෙ

සොබා දහමට අවනත බව මිස

වෙන කිසිවක් නොමැති බව

පැවසුවා නුඹ අපට

බැඳීමක ඇති අස්ථීර බව

පෙරලුවා පිටුවක්

නුඹ අපට නැවත වරක්

සිතන්නට ජීවිතය ගැන

ස්තුතියි කොරෝනා නුඹට

කියා දුන්නාට ජීවිතය